放榜心理

最近幾天天空都很藍，放榜前夕跟WY去散心，灣仔海傍一遊非常舒暢愉快。

放榜了，結果異常地奇妙，A和U同在一張成績單裏。大學我是升不上的了，早知道自己不會那麼順利，也不是不了解在這間中學直升八大院校的機會率是低到哪個地步 ── 而我又不是勤奮那類，所以，一切是意料之內的。最大的意外是，我好似仲未識死，對放榜沒甚麼大感覺，亦覺得「又唔係冇出路」，而「出路」又似乎不一定要有... ，咁囉。

放榜當天我乘了三次的士，三次都是奇妙旅程。從學校到某私立大學(其實咪又係嗰間... )，司機不懂去，說在隧道前放下我，少收我十元。司機邊駕駛邊談電話，我其實嫌他煩，因為我也在打電話向家人報告成績，但他說著說著突然流下淒厲的男兒淚，向電話另一方說「我老豆訓低咗我都唔可以見佢一面，啲死人美國佬好衰，嗚嗚嗚... 」。我見他愈哭愈亂，便立即拿紙巾遞給他，他說不用了(但還是接住了)，然後掛了線專心駕駛。

他好像有點靦腆，說「妹妹妳放心啦，我唔會炒車嘅，但我揸車真係揸得好辛苦，我喊係因為我老豆嗚嗚嗚... 」，未講完又喊一大輪。我立即想起同為的士司機的我父親，平時唔見佢話揸車辛苦架喎，即係辛苦都唔話我地知啦... 。然後我鼻子一酸，連忙安慰他「你冷靜啲先，唔好咁啦，嗱你睇吓我今日放榜呀，我有一科U咗我都仲咁開心啦係咪先？哈哈哈...... 」(明明呢個moment應該係人地安慰我.. )。

到了隧道，下車前我說了一句「人生一定有希望嘅！」之類的(廢)話，他似乎很感激，不斷說「多謝妳呀」，我見他好像開心了一點點，便大力揮手向他道別(附送扮甜美笑容一個)，總之全程仲電視劇過啲電視劇咁..。

然後我跳上另一輛的士，司機兜兜吓忽然彈出一句「(某私立大學)專收垃圾架喎」，我有點絕望，但又覺得很好笑，於是跟他笑了出來。司機問我將來想做甚麼，我說「__ __ 」(我是不會公開的，嘻嘻)，他說「做 __ __ 唔使讀咁多書啦，唔好去報名喇，我車你去遊山玩水吸收靈感好過啦，哈哈哈哈」，多麼可愛的大叔啊(！)。

隨後從私立大學到某副學士報名處，遇上的那位司機知道我喜歡中文，便不斷提及他念書時背誦過的文章(甚麼《七殺碑》呀《道德經》呀咁，反正我沒有學過)。我心想，不知道父親平時會不會跟他的客人咁好傾呢？

看，生活上的小節都足以令我很開心了，仲讀乜鬼野大學啫(開始字是心非... )？之但係開心都要學野架，而我又真是想學多點東西，學深一些... 。唉唉，現在我眼前的路有很多條，不知怎樣選：

A. 讀四年某私立大學讀到畢業，如果想教書，讀多年教育文憑，到時我24歲，可以嫁

B. 讀一年某私立大學 + 重考，如果jupas搞掂咗，再升大學再畢業，到時我23歲，可以嫁

C. 讀兩年某副學士學位課程，如果掂咗升到大學再畢業，到時我24歲，可以嫁

D. 讀兩年某副學士學位課程，如果唔掂升唔到大學，到時我21歲，可以死

E. 讀一年某副學士學位課程 + 重考，如果掂咗就升大學，唔掂就唔知點死

F. 咩都唔讀就咁重考，全力火拼，但如果升唔到大學，又係可以死

G. 半工讀一年，未捱至高考已壯烈身亡

H. 咩都唔讀，找人 + 結婚，再唔係生埋BB，到時都可能係21歲咋喎

(按上述所示，本人最強烈的願望應該是：結婚。)

well，眼前的路何其壯闊，何需擔心沒有所謂「出路」？