三岔口

經過數日數夜不眠不休的胡思亂想，眼前我只有三條路可以選擇：A.某私立大學中文系、B.文學副學士課程、C.重考。對，只有ABC，沒有DEFGH，要結婚，都唔係話嫁就嫁(有人要至得架... )。所以，不如現實啲諗吓前途問題啦。

今早到某私立大學中文系面試，單對單 ── 教授是一位中年男子，中國藉，年約四十至四十七歲，操純正廣東話，頭髮烏黑，身穿淺藍色的確涼裇衫，咀邊經常泛起不經意的微笑，未確認是否笑騎騎放毒蛇，懷疑接受過風水命理或心理學訓練 ── 皆因佢睇穿晒我所有野，勁過睇相佬：

首先他問我「點解妳唔讀新傳系呢？妳個人動態定靜態架？」，我當然想也不想就回答「靜態」吧(雖然是間歇性的..)，然後胡扯自己很喜歡閱讀呀寫作呀之類。他不斷翻閱我的資料，說「咦係喎，妳拎過寫作嘅獎喎，唔鍾意都唔會投稿啦係咪？」，我微笑附和，心想「咁有獎金架嘛..」。

他叫我解釋得獎那兩篇小說的內容，其實那兩篇核突到死的「小說」我如今已經不想再提起了(連諗起都覺得自己低能)。誰料我喋喋不休說完一大輪之後他似乎很欣賞，還說「妳真係好適合讀中文系喎」，我心想「今次得米喇」，於是繼續說說說，話題由喜歡哪個作家到平時的生活習慣、交友模式等等無所不談。

又喋喋不休一大輪之後，教授的眼神好像有點猶豫 ── 他展開連珠炮發式的提問或者驚歎：「妳平時同一大班人相處嗰陣，會唔會有一撮人特別唔鍾意妳？」、「妳啲性格都好強烈喎(！)」、「妳上堂係咪成日靈魂出竅架？」、「咁妳都好反叛吓喎」、「妳係咪好鍾意發白日夢架？」、「(看完我的高考成績單後)妳個人都幾極端喎」、「妳會唔會唔睬人，淨係做自己鍾意做嘅野？」 ── 嘩！神過神算子！這叫我如何招架？

都唔知係去面試定係去批命，反正這位可愛的教授「批中」我所有的缺點和個性，不佩服他也不行啦。我只能承認以上的一切，並以一些較漂亮的說法去裝飾自己的缺陷，而我也不想撒謊，我如實地(唔知醜地)告訴他「其實我唔鍾意文言文，不過度度啲中文系都係咁架啦，唔打好根基又點寫作呢哈哈哈哈..」，他也跟著我哈哈哈哈。能博得他開懷一笑，便算了，結果如何？是但啦。

雖然開心，但還是煩惱：如果佢收咗我，到底讀唔讀好呢？

唉唉，好像無論選擇哪條路，都有無法預測的風險，讀副學士怕心散、重考怕不夠高分、讀私立大學又似乎心有不甘、中文系又不是我的最愛...。簡直是人生交叉點。

我真係唔識揀。